1Ti 2 | KZE | STEP | maarán-áímbá simátimiyo séꞋa kwésimamune. ÁánútumpaꞋo námúnaamo kwésemba anón-tantaaꞋan-iye. mindáyavesa námúnaamo kwésemba Áánútu amápa-kwaasi túwaꞋnaa ínkwáe sésa kwéaisaa-esa súwi kwésewe.

1 Timothy 2

ÁánútumpaꞋa námúnaa sen-kwásáí.

1 maarán-áímbá simátimiyo séꞋa kwésimamune. ÁánútumpaꞋo námúnaamo kwésemba anón-tantaaꞋan-iye. mindáyavesa námúnaamo kwésemba Áánútu amápa-kwaasi túwaꞋnaa ínkwáe sésa kwéaisaa-esa súwi kwésewe. 2 Áánútu anón-kwaasiye kenkáꞋá kárákwiraan-kwaasiye túwaꞋnaa ínasa námúnaa síyamba paru umáíya moórávinta méta Áánútuntaveta imáyáa éta arupí umáíya ménaumne. 3 mirán-dámúnáámó sembá Áánútu aúrankaꞋa kaweꞋá umái sewaná póna aamoí éna kwemá sáwí-imayaavinkembo iyásínkáiwaiya póna aamoí kwéiye. 4 Áánútu amáparawai sáwí-imayaavinkemba iyátinkainasa kwená árair-aimba isánááontavena arááíma kwétaiye. miráyávésamo amápa-kwaasiyavesamo imáyáa ésamo ÁánútumpaꞋo námúnaamo kwésemba kaweꞋán-iye. 5 Áánútu mimbóráwáí máyáísana Áánútuwe kwená kwaásiyeti avumpimbó máyáimba mimbóráwáí ména minkwáásígó áwíꞋa Ísu Káráísiti ména kwaási Áánútunte kwétarutinkena 6 amáparawai sáwí-imayaavinkemba iyátinkanaumne séna taairaꞋá pukáiye. Áánútu amáparawai kentí sáwí-imayaavinkemba iyátinkanaumne séna mirán-kánáá tíníye siráimba póna Ísu Káráísitimba aiꞋmarówana kumpukáiye. 7 miráumai Áánútu simásimena séna aantá-kwaasi-iꞋa éma óꞋonkaa-kwaasi simátímaꞋmae naauwó séna siꞋmarówaꞋa kwená árair-aintavesa áraire sénááontaveꞋa simátímaꞋmaeꞋa kwéiyune. mináímbó súnda íma kampar-áímbá kwésumpo árair-aimba kwésune.

8 naaóꞋ-naoken-kwaasi tayorupamái mésa Áánútuntavesa imáyáa ésa íma áwááꞋa sésa íma aaisambá sésa námúnaa sénááontaveꞋa mirán-oro kwésune. 9 tayorupamái mésamo Áánútuna imáyáamo mósá maránááomba aaraimá maarámó iíyávéna sirááíma kwétaiye. íma túma maé iyésa kaweꞋá umái unáánkwátói ésa kwaási arááꞋa súrampimba sivúwóvo sésa íma konaarirí ésa 10 íma mirá-sáwíꞋá ésa kaweꞋ-máyáíyé suꞋmai máéwasa tuwánanaaowe. aaraimó kesáváímó sésamo ÁánútuntaveꞋa imáyáa kwéune sen-ínímbó kaweꞋ-máyáímó kwémayaantemba mirán-oro. 11 aaraí íma túma maé iyésa aánoumai mésa Áánútun-aaimo kwésen-kwaasi táái isánááowe. 12 aaraimá íma kwaairáꞋá kárákwiraawai mésa kwaai túrankaꞋa íma komésa aaí kwésimatimesa aánoumai máyáawe kwésune. 13 naaóváꞋá Áánútu Áándamumba aivaꞋá úmarena naaémba awainínkómbá Ívimba úmakaintaveꞋa mináímbá kwésune. 14 Sáátáánigo íma Áándamuntavena siráivo Ívintavena kampar-áímbá simámuwana áraire séna aivaꞋá Áánútun-aai káráyukaiye. 15 ánivo aaraimá iyámpóímo matínkáiyambo éna sáwíꞋa umái mémpinkemba Áánútu tiráníye. aaraimó ÁánútunkaꞋo agevamáímo mésamo kwená imáyáamo ésamo arupí umáímo aánoumaimo maíꞋmaiꞋo úmae iyésamo mirámó íyanamo éna Áánútu sáwíꞋa umái mémpinkemba tiráníye.